Rrëfehet taksisti: “Fiqiriu-Nazimja, 4 orët e bisedave intime para vrasjes”

tweet

Aktualitet e Dielë, 19 Gusht, 2012 | 11:56 am

Myrvet Bardhi është dëshmitari kyç i ekzekutimit të datës 13 gusht, atëherë kur në ora 00:50 minuta, në afërsi të xhamisë në Qendër- Krrabë, në banesën e saj, Nazime Visha, 18 vjeç, vrau me armë zjarri Fiqiri Muçën, 45 vjeç, i martuar dhe baba i 5 fëmijëve.

Që të dy kanë pasur lidhje intime bashkë, edhe pse lloji i marrëdhënies ndahet në dy versione; me dëshirë nga ana e familjarëve të Muçës dhe përdhunim e rrëmbim nga ana e familjarëve të Vishës. Kështu të paktën e transmetoi ngjarjen Policia, por vrasja u pranua edhe nga vetë Nazimja, e cila i priti uniformat blu në vendin e krimit. Bashkë me autoren e ekzekutimit, në pritje të mbërritjes së Policisë në vendngjarje, ka qëndruar edhe Myrvet Bardhi. Djali 26- vjeçar, me origjinë nga Dibra dhe banues prej 18 vitesh në Sukth, është personi që ka shoqëruar Fiqiri Muçën për disa orë me taksi, ku destinacioni final ka qenë Krraba. Aty ku ai vdiq pranë një përroi, mes ferrave, teksa vraponte për t’iu shmangur plumbave me breshëri të 18- vjeçares. Por derisa të arrijmë te fataliteti, Myrvet Bardhi ka shumë për të treguar. Duke folur ekskluzivisht për gazetën “Panorama”, ai ia nis që nga momenti i njohjes me viktimën…

Prej sa kohësh njiheshit me Fiqiri Muçën?

Jam njohur dy ditë para se të ndodhte vrasja.

Është thënë se njiheshit edhe më parë, e keni pasur klient prej vitesh…

Nuk e di nga kanë dalë këto deklarime, por unë nuk e kam njohur më parë Fiqiri Muçën. Prej vitesh jo e jo, sepse unë jam 26 vjeç dhe nuk kam punuar taksi pa marrë patentë. Po ashtu, unë shërbej taksi herë pas here, kur më ngelet kohë nga puna që bëj në ndërtim. Pra, nuk rri gjithë kohës te vendi i taksive. Ishte krejt rastësi njohja me Fiqiriun.

Si ndodhi?

Ju thashë që dy ditë para krimit, ai erdhi aty ku janë taksitë në Sukth dhe u drejtua nga unë. Më tha se i duhej një taksi për të dielën se do të shkonte në Tiranë dhe Fushë-Krujë. Patjetër, u tregova i gatshëm dhe entuziast që gjeta një klient për rrugë të gjatë. Ai më mori numrin e telefonit dhe më tha se do të lidheshim me celular….

(Intervisten e plote me taksistin, Myrvet Bardhi, i cili eshte nje prej deshmitareve kryesore te ngjarjes se ndodhur ne Krrabe, e lexoni ne numrin e sotem te gazetes, Panorama)

Nga e dërguara jonë në Sukth,
ELISABETA ILNICA

tweet