Sporti nga bota
Sport e Shtunë, 28 Korrik, 2012 | 13:23 pmArsenali, i pafuqishëm përballë Sitit
Dy gola në 3 minutat e fundit të pjesës së parë mjaftuan për të kapitulluar Arsenalin në miqësoren me Mançester Sitin në Pekin. Skuadra e Roberto Mançinit fitoi përpara 50 mijë spektatorëve në stadiumin e famshëm “Foleja e Zogut” falë golave të Zabaletës dhe Jaja Turesë. Gabimet në mbrojtje u kushtuan shtrenjtë “topçinjve” në minutën e 41-të dhe 44-t.
Barcelona tërhiqet për Havi Martinez
Barcelona tërhiqet përfundimisht nga gara për të firmosur me Havi Martinezin. Sipas mediave spanjolle, shkaku i dështimit të këtij operacioni nuk janë 40 milionë eurot që kërkon Atletik Bilbao për kartonin e mesfushorit shkatërrues, por taksa e TVSH-së që do të paguhej në rrogën e tij. Katalanasit kishin ndër mend t’i ofronin yllit të përfaqësueses iberike një kontratë me rrogë vjetore deri në 3 milionë euro.
“Euro 2012”, Nasri pezullohet me tri ndeshje
Mesfushori i Mançester Sitit, Samir Nasri, është pezulluar me 3 ndeshje nga Kombëtarja franceze për shkak të fyerjeve ndaj një gazetari pas eliminimit në Europian të Francës. Pas fitores së Spanjës 2-0 në çerekfinale, Nasri fyeu rëndë një gazetar që i kërkoi një prononcim pas ndeshjes. Ndaj tij, Zheremi Menezit, Hatem Ben Arfasë dhe Jan M’Vilës nisi një hetim i Federatës. Menez u dënua me vetëm një ndeshje pezullim.
Montpelie-Lion, sot Superkupa e Francës
Fituesja e Ligës së Parë të Francës, Montpelieja, dhe ai i Kupës së Francës, Lioni, do të ndeshen sot në “Red Bull Arena” të Nju-Xhersit për shpallur fituesen e trofeut të Superkupës së Francës. Lioni vlerësohet nga koeficientet e basteve si favorite për ta fituar Superkupën për shkak edhe të eksperiencës më të madhe në garën për këtë trofe. Kjo skuadër e ka fituar Superkupën shtatë herë në historinë e saj.
Milani i ofron 4.5 mln euro në vit Kakasë
Milani i propozon Rikardo Kakasë një kontratë 4-vjeçare dhe 4.5 milionë euro në sezon. Kuqezinjtë i kanë bërë një ofertë të dytë Realit të Madridit prej 13 milionë eurosh. Reali kërkon 20 milionë euro për brazilianin. Milani synon edhe mesfushorin 25-vjeçar, Sami Khedira. Emri i mesfushorit tunizian ka kohë që figuron në listën e drejtuesve të Milanit.
