“Topi i Artë shkon për Kasijasin”
Sport e Mërkurë, 4 Korrik, 2012 | 15:57 pm
Kristiano Ronaldo dukej sikur ishte fituesi i “Topit të Artë” pa përfunduar ende sezoni futbollistik me Realin e Madridit. Ylli portugez realizoi një paraqitje të shkëlqyer, duke ndihmuar ekipin e tij që të fitojë titullin kampion në Spanjë dhe duke shënuar 60 gola në 55 ndeshje. Ndërkohë, në kampionatin europian ai e nisi keq, por e vazhdoi mirë, duke shënuar dy herë dhe duke e çuar Portugalinë e tij deri në gjysmëfinale. A mjaftojnë këto për të fituar “Topin e Artë”?! Revista prestigjioze “France Football”, e cila krijoi edhe çmimin në vitin 1958, duket se ka kurorëzuar Iker Kasijasin. Në një përshkrim të bërë për portierin e Spanjës, shkruhet: – “Për paraqitjen e tij të shkëlqyer ndër vite, duke filluar nga Europiani i vitit 2008, për thjeshtësinë, maturinë, qetësinë dhe talentin e tij, Iker Kasijas meriton pa diskutim “Topin e Artë”. Ai shkëlqeu në Europianin e fundit, duke qenë një nga lojtarët që kontribuoi më shumë në triumfin e Spanjës. Me pritje dhe reflekse mbresëlënëse, ai pësoi vetëm një gol në gjashtë ndeshje dhe qëndroi 509 minuta radhazi i pamposhtur. Iker Kasijas ka zhvilluar 137 ndeshje me kombëtaren e tij, ku 100 prej tyre i ka fituar dhe plot në 75 raste nuk ka pësuar gol”. Një përshkrim me nota të theksuara vlerësimi, të cilat pa diskutim janë të merituara. Gjithsesi, pavarësisht se “France Football” e ka vlerësuar si fituesin e çmimit prestigjioz, nuk është ajo që e vendos atë. Kandidatë të tjerë potencialë janë edhe Kristiano Ronaldo, Andrea Pirlo, Ksavi Hernandez, Andres Iniesta dhe Lionel Mesi. E ndonëse në fillim listën e favoritëve e kryesonte Ronaldo, tashmë në krye është ngjitur Kasijasi.
Zhordi Alba, sot nis aventura katalanase
Zhordi Alba do të rikthehet sot në shtëpi për herë të parë, pas 6 vitesh. Barcelona do të prezantojë blerjen e saj më të fundit në “Kamp Nou”. Katalanasit i paguan Valencias 14 milionë euro për mbrojtësin e majtë, dhe 23-vjeçari e justifikoi gjithçka duke shkëlqyer në Europian me Spanjën. Alba do të mbërrijë sot në orën 12:30 në Barcelonë, për të bërë foton zyrtare me presidentin Sandro Rosell. Ai do të japë edhe një konferencë për shtyp. Ndërsa nesër, ora 08:30, do t’u nënshtrohet vizitave mjekësore në qendrën e klubit “Joan Gamper”. Në orën 16:00 po të ditës së enjte do të hedhë dhe firmën në kontratën 5-vjeçare. Një orë më pas do të shkelmojë topin e parë si katalanas në “Kamp Nou”.
