Bekenbauer: “Gjermania nuk fiton Europian me këtë lojë”
Sport e Martë, 19 Qershor, 2012 | 14:49 pmPavarësisht se Gjermania nuk po njeh rival, formacioni i përzgjedhur nga trajneri Joakim Lëv nuk ka bindur plotësisht legjendën gjermane, Franc Bekenbauer. Kajzeri bavarez ka një kontratë me të përditshmen gjermane “Bild” dhe pas çdo ndeshjeje të kombëtares analizon paraqitjen e “pancerave”. “Kombinime, kombinime dhe vetëm kombinime, por pa rrezik. Nuk është kjo loja e bukur apo filozofia që huton kundërshtarët. Nëse duam të shmangim surprizat, duhet që në kombinim e dytë të prekim rrjetën. Shumë prej tyre luanin të distancuar, në vend që të gjuanin në drejtim të kuadratit. Ndaj Greqisë duhen marrë masat ndryshe. Për t’u shpallur kampion, duhet me patjetër që skuadra të pësojë ngritje. Zgjedhjet e Lëvit më kanë pëlqyer, por niveli konstant i lojës edhe mund të bëhet i lexueshëm. Jam i bindur që trajneri po jep maksimumin për të përballuar çdo sfidë”.
