Çavez dhuron shtëpi për ndjekësen e tij të 3-miliontë
Kuriozitete e Hënë, 4 Qershor, 2012 | 14:30 pm
Si do të ndjeheshit po të merrnit në këmbim të një klikimi në internet një shtëpi? Fatlumja ishte një vajzë 19-vjeçare venezuelase, Natalia Valdivieso. Dhurata për të ishte nga Presidenti i Venezuelës, Hugo Çavez dhe ndodhet në ishullin karaibik, Margarita. Vajza rastisi të jetë ndjekësja e tij e tremiliontë në “Twitter”. Konfirmimi për dhuratën u bë nga vetë Presidenti Çavez, i cili e ka uruar 19-vjeçaren. Ditën që mori çelësat e shtëpisë, Valdivieso, e cila jetonte në këtë ishull edhe më parë, ka postuar foto të shumta dhe mesazhe lumturie në “Twitter” duke e quajtur Çavezin si “Presidenti më i mirë”: “Jam zgjuar duke menduar se kjo ishte dita më e lumtur e jetës sime. Presidenti im i dashur pa se për çfarë kisha nevojë dhe më ndihmoi. E dua shumë, i dërgoj puthje dhe i uroj shërim të shpejtë”, shkruante 19-vjeçarja.
